Heb 4 | KUD | STEP | Yaubada yana waloyemidiwa howola imiyamiya ebeha yana abaꞌaiyawasi iya ainaena talobai, eeta ilowoinanegita na tameheuhei mata dova ta tupwada tabeꞌu na nigele tayalobai.

Hebrews 4

1 Yaubada yana waloyemidiwa howola imiyamiya ebeha yana abaꞌaiyawasi iya ainaena talobai, eeta ilowoinanegita na tameheuhei mata dova ta tupwada tabeꞌu na nigele tayalobai.

2 Moiha wasa namwanamwana imohegitaꞌo, dova hiya mugai imohediꞌo, ta wasanane nigele iyahaguidi, wuwuna hibenalenaꞌo na nigele hiyayemidiyei. 3 Na ita ana tauyemidiwo aiyawasi bada talobaiyaꞌo, na hiya mugai nigele hiyalobai wuwuna Yaubada iwalo venayaidi iwalo:

‘Yamodiꞌiniyedi ainaena yawalo venayaidi ta havena aiyawasi aliguwena hilobalobai’.
Yaubada yana aiyawasi imiyamiya, wuwuna baleꞌu maudoina iyemasele iꞌovi, na iꞌaꞌaiyawasine. 4 Na ahubenane iꞌaꞌaiyawasine vehabana bada Buki Veꞌahihi ainai iꞌaubabadaenaꞌo, iwalo, ‘Yaubada ahubena sebenina ainai yana paihowa maudoina aidiyena iꞌaiyawasi’. 5 Eeta tanuwanuwatuwu yana walo teina vehabana, ‘Havena abaꞌaiyawasi aliguwena hilobalobai’.

6 Teina haugane abaꞌaiyawasinane imiyamiya na hesi mugai nigele bagibagilidi hiyalobai. Mosese yana hauga ainai hiya wasa hibenale mugaiyei na wasane hiꞌawa sewaei. Eeta nigele hiyalobai. 7 Ainaena Yaubada hauga vauvauna imwauwi na ainai tomowa abaꞌaiyawasi hilobai, na hanapu Deivida ainai imohei ta Deividanane iwalo:

‘Ebe Yaubada alinana ambenalei havena amꞌuluꞌulu yaiyai’.
8 Ta abaꞌaiyawasine Yaubada iwawaloweine nigele Yosuwa yo yana bodao yadi abaꞌaiyawasi, na hesi vali abaꞌaiyawasi, neta hauga ehebo vauvauna imwauwiyaꞌo ta ebe tomowa aiyawasinane hilobai. 9 Na Yaubada yana tomowa ita yada abaꞌaiyawasi imiyamiya, na abaꞌaiyawasinane Tapwalolo ana aiyawasi dova. 10 Eeta ebe talobai, ita yada paihowa ainaena taꞌaiyawasi, dova mugai Yaubada yana paihowa ainaena iꞌaꞌaiyawasine.

11 Na ilowoinanegita ebe tatowolo wahiyala ta aiyawasinane talobai, na havena teya yaiya iꞌawaꞌawa sewa mata dova ta ibeꞌu, dova hiya mugai hibebeꞌune.

12 Moiha, Yaubada yana walo mayawahina na wahiwahiyalana dova elepa aleꞌaleha yana mehemehegai matupwa bwaubwauna, na howahowana itomgita ta hola aliꞌalilidai nuwatuwu yo mumuga dawadawanidi himiyamiya iveꞌitaedi. 13 Wuwuna Yaubada mehenai nigele teya ginauli iyamiya aidawani, maudoina maseleyai, na iya ainai howola abo yada paihowa maudoina tawalo mahalavaedi.

Yada taupwaoli mwalaꞌina iya Yeisu

14 Yada taupwaoli mwalaꞌina imiyamiya, iya Yeisu Yaubada Natuna, vehabada ihaeꞌo galewai, ainaena yada yemidi ainai taꞌabi avivini. 15 Tupwadi taupwaoliwo nigele hiyaꞌatemuyamuyaegita yada tapiyao vehabadi, na Yeisu hesi yada miya vitai ihanapuidiꞌo ta iꞌatemuyamuyaegita, wuwuna mwalona baleꞌuwai Tomodulele yana woya maudoina ilobaidiꞌo dova ita taꞌi talobalobaidi, ta Yeisu nigele teya hinage yana pwanoli. 16 Ainaena mayada atepatu talau yo taꞌawaꞌawanoi ada Tauloinane ainai ta ainaena yada miya vitai aidiyai iveꞌiꞌilaegita na hinage ihaguigita.